التربية على النفاق

في أكتر الأوقات بنربي أولادنا غلط وبعدين نقول أخلاقهم وحشة أو الولد طلع مشوه نفسيا.

ابني الصغير لقيته بياكل وبيوقع الرز حوليه وأحياناً بياكل بطريقة غلط والأكل بيقع على هدومه.
يعني الناس لما يشوفوك يقولوا عليك ولد مش متربي.

كأي طفل برىء مش فاهم حاجة بيردد الكلام سمعت بيشتم طبعا ما سكتش وقمت مزعق فيه وقولت له (عيب) ، الناس لما تسمعك بتقول كده هيقولوا عليك (قليل الأدب)

وشوفته لابس تيشيرت على بنطلون مش لا يقيين على بعض ، فقولت الناس لو شافوك كدا هيقولوا عليك شحات أو هيفكروا إنك عبيط.

(الناس هيقولوا الناس هيفكروا الناس هيعملوا .... )

بنربيهم على النفاق والرياء، المهم رأي الناس لكن طالما عملت الغلط بعيد عن عيون الناس مش مهم.
بنربيهم على تضخيم رأي الناس والخوف من كلامهم والحرص على رضاهم ، وكل دا ضلال وفساد ، وبعدين ترجع تقول (ابني ما لوش شخصيته ، ضعيف ومنكسر قدام الناس)

انت اللي زرعت فيه دا من غير ما تدرك.

ربي ابنك إنه يعمل الحاجة الصح في كل الأحوال ، علشان هي صح ، ربيه على مراقبة الله مش الناس ومراعاة نظره واطلاعه عليه.

شوف النبي ص كان بيربي عبد الله بن عباس إزاي وكان لسه طفل صغير.

عن أبي العباس عبد الله بن عباس رضي الله عنهما قال : كنت خلف النبي صلى الله عليه وسلم يوما ، فقال : ( يا غلام ، إني أُعلمك كلمات : احفظ الله يحفظك ، احفظ الله تجده تجاهك ، إذا سأَلت فاسأَل الله ، وإذا استعنت فاستعن بالله ، واعلم أن الأُمة لو اجتمعت على أَن ينفعـوك بشيء ، لم ينفعوك إلا بشيء قد كتبه الله لك ، وإن اجتمعوا على أن يضروك بشيء ، لم يضروك إلا بشيء قد كتبه الله عليك، رفعت الأقلام وجفت الصحف ) رواه الترمذي وقال : حديث حسن صحيح