أخيراً بايدن تنحى عن السباق الرئاسى ، ومش هيترشح لفترة جديدة ، برده الراجل كان كبير في السن وكان عنده مشاكل كتير صحية وبيتكعبل في سلم الطيارة وبيتوه ومش عارف بيقول إيه وبينسى وبيقع ... ويامه ناس ضحكت واتريقت ... لكن خلاص اه هو بنفسه نزل تغريدة بيعتذر فيها عن الترشح ... وأكيد الموضوع مش سهل عليه ... التغريدة دي عبارة عن اعتراف رسمي ... اعتراف إنه مش قادر ... التغريدة اعتراف إن صحته أضعف من إنها تساعده في المنصب المميز اللي هو كان فيه ... تخيل قدامك الفرصة مفتوحة إنك تبقى رئيس أقوى دولة سياسيا واقتصادياً ... بس أنت مش قادر ... أكيد الموضوع صعب الإحتمال.
وخلة بالك إن كلنا هنوصل المرحلة دي ، لو ربنا طول في عمرك ، تلاقى صحتك بالتدريج في النازل ، و بدأت تعجز ، وتعجز يعني تعجز إن تعمل حاجات كنت متعود وقادر تعملها.
{ ۞ ٱللَّهُ ٱلَّذِی خَلَقَكُم مِّن ضَعۡفࣲ ثُمَّ جَعَلَ مِنۢ بَعۡدِ ضَعۡفࣲ قُوَّةࣰ ثُمَّ جَعَلَ مِنۢ بَعۡدِ قُوَّةࣲ ضَعۡفࣰا وَشَیۡبَةࣰۚ یَخۡلُقُ مَا یَشَاۤءُۚ وَهُوَ ٱلۡعَلِیمُ ٱلۡقَدِیرُ } [سُورَةُ الرُّومِ: ٥٤]
قال الله عز وجل : ( وَاللَّهُ خَلَقَكُمْ ثُمَّ يَتَوَفَّاكُمْ وَمِنْكُمْ مَنْ يُرَدُّ إِلَى أَرْذَلِ الْعُمُرِ لِكَيْ لَا يَعْلَمَ بَعْدَ عِلْمٍ شَيْئًا إِنَّ اللَّهَ عَلِيمٌ قَدِيرٌ ) النحل/ 70 .
علشان كدا لازم تلحق نفسك وشبابك ، ما تقولش ليه بدرى ، العمر بيجري أسرع مما تتخيل.
توب إلى الله انهارده ، أعبد ربنا انهارده ، بر والديك ، صل الرحم ، صلى ، اطلب العلم ، ذاكر ، اجتهد في تربية ولادك تربية صالحة ... اشتغل في الدعوة ... حط لنفسك اهداف واشتغل عليها ... سافر. المهم ما تضيعش وقت
بلاش تضييع وقتك ودينك في نوم وتليفزيون ومسلسلات وتك توك وماتشات . اتسلى براحتك بالحلال بس مش كل حياتك تسالي.
يقول النبي صلى الله عليه وسلم : (اغْتَنِمْ خَمْسًا قبلَ خَمْسٍ: شَبابَكَ قبلَ هِرَمِكَ، وصِحَّتَكَ قبلَ سَقَمِكَ، وغِناكَ قبلَ فَقْرِكَ، وفَرَاغَكَ قبلَ شُغْلِكَ، وحَياتَكَ قبلَ مَوْتِكَ)،
