كل بنت أو ست، كبيرة أو صغيرة، آنسة أو مطلقة أو أرملة ، معاها أولاد أو مش معاها ... من حقها تتزوج وتعيش مع راجل وتتبسط معاه ويبقى عندها أولاد وتخلف أولاد تانى وتالت ورابع.
هي دي الطبيعة البشرية والحاجة الإنسانية ، وهو دا شرع ربنا الحلال ، أي كلام تاني بقى أو عادات غبية وتقاليد متخلفة أو كلام ناس جهلة مش فاهمين أو ناس بيدعوا الفضيلة بالكذب ... كل دا ولا يسواى عندي حاجة.
لازم نبطل بقا الحاجات اللي الغبية اللي بنحرم بيها نفسنا من متع الحياة الحلاااااال ، والله حلال.
منها الآتي:
*بنت عندها ٤٠ سنة (عانس ، خلاص فاتها قطر الجواز)
*ست عندها ٥٥ سنة (تتجوز ليه؟! ما تحترم سنها بقى)
*راجل سنه ٦٠ سنة (يتجوز إزاي في السن دا ، ما يتهد بقى)
*الصغيرة جالها عريس (الكبيرة لازم تتجوز قبل الصغيرة)
*أرملة عندها أطفال (عيشي بقى لولادك وبلاها جواز)
*شاب صالح متقدم لبنتك (بنتي مش أقل من فلانة أو علانة، لازم تجهز بنتي أحسن جهاز وتمضي على قائمة بربع مليون)
*شاب صالح متقدم لبنتك على قد حاله (لازم تجيب شقة تمليك وتفرشها من مجميعه وتجيب سفرة وونيش واوضة اطفال وغسالتين و٢ ثلاجة و٢ تليفزيون ....)
*راجل عاوز يتزوج الثانية بدل ما يمشى في الحرام (شوف الراجل الناقص أبو عين زايغة الخاين)
*الزوجة الثانية (خطافة الرجالة)
*شاب ٢٠ سنة عاوز يتجوز ويطفئ شهوته (افرح بشبابك وما تشليش مسؤوليات انت لسه صغير)
*شاب يتزوج امرأة أكبر منه في السن أو العكس (من همه واخد قد أمه)
وغيرها من العادات والتقاليد الغبية اللي بتعارض الدين والشرع والعقل والمنطق.
تزوجوا .. وشجعوا بعض على الحلال بكل أشكاله .. ويسروا الزواج للكبير والصغير .. وبلاش تعقيدات .. الحياة أبسط من كدا .. وتأكد أن فتح أبواب الحلال بيقفل أبواب الحرام وما أكثرها .
{ وَمِنۡ ءَایَـٰتِهِۦۤ أَنۡ خَلَقَ لَكُم مِّنۡ أَنفُسِكُمۡ أَزۡوَ ٰجࣰا لِّتَسۡكُنُوۤا۟ إِلَیۡهَا وَجَعَلَ بَیۡنَكُم مَّوَدَّةࣰ وَرَحۡمَةًۚ إِنَّ فِی ذَ ٰلِكَ لَـَٔایَـٰتࣲ لِّقَوۡمࣲ یَتَفَكَّرُونَ }
[سُورَةُ الرُّومِ: ٢١]
