أحياناً تنصح إنسان تلاقيه يقولك ... ما كل الناس بتعمل كدا ... يعنى إنت اللي على راسك ريشة ما بتغلطش أبدا !!
لأ مش على راسي ريشة ولا حاجة ... وكلي ذنوب وعيوب وأخلاقي مش أحسن حاجة ...
لكن الدين النصيحة كما قال النبي صلى الله عليه وسلم، ولازم ننصح بعض ... و ندل بعض علي الخير في أمور الدنيا والآخرة ... ونساعد بعض قدر المستطاع ... ابتغاء وجه الله ... علشان هي دي أخوة الإيمان ... وهو دا مقتضى الحب في الله ... والإحسان إلى الخلق.
استغرب جدا لما ألاقي اتنين أصحاب ، و واحد فيهم بيصلى والتاني لأ ... أو واحد شايف صاحبه على معصية ومش بينصحه ... ولما تقوله إنت ليه مش بتنصح صاحبك ... يقولك أخاف إنه يزعل مني أو يضايق !!
تخيل لو صاحبك دا لقيته ماشي في الشارع وهيقع في حفرة ... تسيبه ولا تنبهه ... وممكن تزقه بعيد علشان ما يقعش في الحفرة ... ساعتها عمرك ما هتخاف على زعله وهو مش هيزعل لما يعرف ... لكن هيزعل جدا لو وقع في الحفرة وعرف إنك سيبته وما نصحتوش.
هو دا بالظبط اللي هيحصل يوم القيامة ... لو ما نصحتوش بطاعة الله ... هو دا اللي هيحصل لو دخل جهنم بسبب الذنوب اللي انت شوفته بيعملها وسكت وما نصحتوش.
قال الله: (ٱلۡأَخِلَّاۤءُ یَوۡمَىِٕذِۭ بَعۡضُهُمۡ لِبَعۡضٍ عَدُوٌّ إِلَّا ٱلۡمُتَّقِینَ)
[سورة الزخرف 67]
انصح الناس برفق ولين وحب وحرص عليهم ... ما تقولش أنا بعمل ذنوب برده ! ... لازم ننصح بعض ... عمرنا ما هيكون لينا قيمة ولا مكان ولا مكانة إلا بوقفتنا جنب بعض وناخد بإيد بعض فيما ينفعنا في الدنيا ويوم القيامة.
(وَٱلۡمُؤۡمِنُونَ وَٱلۡمُؤۡمِنَـٰتُ بَعۡضُهُمۡ أَوۡلِیَاۤءُ بَعۡضࣲۚ یَأۡمُرُونَ بِٱلۡمَعۡرُوفِ وَیَنۡهَوۡنَ عَنِ ٱلۡمُنكَرِ وَیُقِیمُونَ ٱلصَّلَوٰةَ وَیُؤۡتُونَ ٱلزَّكَوٰةَ وَیُطِیعُونَ ٱللَّهَ وَرَسُولَهُۥۤۚ أُو۟لَـٰۤىِٕكَ سَیَرۡحَمُهُمُ ٱللَّهُۗ إِنَّ ٱللَّهَ عَزِیزٌ حَكِیمࣱ)
[سورة التوبة 71]
ليست هناك تعليقات:
إرسال تعليق